Pouor aver un bouôn fricot Jèrriais, i' faut gouôter des mèrvelles, des pais au fou, des bourdélots, des crabes, du honmard, d'la soupe d'andgulle, du pain Jèrriais auve du bouôn beurre dé Jèrri, du nièr beurre et du cidre.

Malheutheusement, auve tout chein qu'nou trouve dans les supèrmarchièrs et la vie qu'nou mène aniet, ch'est d'tchi rare dé pouver mangi coumme au temps pâssé. Tchi pitchi!

Mais la fais'sie d'nièr beurre est eune couôteunme tchi vit acouo. À la fîn du mais d'Octobre 2002, L'Assembliée d'Jèrriais organnîsit eune séthée d'nièr beurre siez Mess Le Gresley à Ste. Mathie. Les portraits mouontrent coumme tchi qu'nou dait r'muer l'nièr beurre duthant quâsiment trente-siêx heuthes.