|
|
Saint Hélyi - Saint Hélier
|
Châque année, y'a un pèlerinnage à l'Hèrmitage d'Saint Hélyi - dé couôteunme lé Dînmanche lé pus près du seize dé Juilet.
Né v'chîn des photos du pèlerinnage 2006.
|
|
Dans sa poésie sus la Grève dé Douvre, lé poète Angliais Matthew Arnold êcrivit entouor l'èrtithant d'la Mé d'Fouai au dgiêx-neuvième siècl'ye. Ichîn en Jèrri au vîngt-tch'ieunième siècl'ye, les pélérîns d'la Saint Hélyi n'ont pon à lus gêner entouor l'èrtithant, car ch't' année ch'est sustout l'montant d'la mathée tch'empêche lé pèlerinnage traditionnel.
|
|
S'lon la légende, Hélyi fut né à Tongres, tch'est achteu en Belgique. I' viagit au Cotentîn, où'est qu'il entrit dans l'monastéthe dé Saint Marcou à Nanteuil, tch'est achteu Saint-Marcouf-des-Îles. Marcou avait r'chu des pliaintes des Jèrriais tchi 'taient m'nichis par des pithates tch'attatchaient rédguliéthement l'Île. Marcou don envyit Hélyi et un assistant tch'avait nom Romard en Jèrri.
|
|
Hélyi s'înstallit sus un rotchi dans la Baie d'la Ville (ch'est l'Rotchi d'l'Hèrmitage) et Romard pâssait des m'sages entré l'saint et les pêtcheurs tchi d'meuthaient dans l'village dans les mielles (ch'es'sait la Ville dé Saint Hélyi à v'nîn). Dé san liet dan l'rotchi, Hélyi pouvait vaie les vailes des pithates sus l'horizon et sîngnaler ès gens à seule fîn qu'i' pûssent aller lus muchi - v'là pouortchi qu'nou-s'appelle des nouages sus l'horizon ''les vailes dé Saint Hélyi''.
|
|
Auprès 13 années dé priéthe et d'jeûn, Hélyi 'tait si afouaiblyi qu'i' n'pouvait d'aut' sé muchi. Les pithates lé happit et copit sa tête horte atout eune hache. Par un mithacl'ye, à chein qu'nou dit dans la légende, Hélyi râmassit sa tête et marchit deux-trais pas auve. Bein êffrités, les pithates happîtent la pathe.
|
|
Lé corps dé Hélyi fut trouvé sus l'sablion par Romard tchi l'apportit dans la Grand' Tèrre. Lé corps vînt à tèrre à Bréville-sus-Mé - eune fontaine dgéthisseuse coule dé ioù qu'lé corps du saint fut pliaichi et l'églyise a eune stchulputhe en bouais du saint du Mouoyen Âge.
|
|
Châque année, lé martythe du saint patron est mèrtchi en Jèrri par un pèlerinnage à l'Hèrmitage.
|
|
I' y'a un creux dans l'rotchi couvèrt par l'Hèrmitage tch'est connu coumme lé Liet à Saint Hélyi. Nou peut aîsiment înmaginner la vie sévèthe du Saint tchi d'meuthait et priait ichîn à san tout seu, exposé ès vents et à la mé duthant tchînze ans.
|
|
