Ma femme et mé j'd'meuthons touos seurs
Dans eune maieson parmi les flieurs,
J'bai du cidre et yi du thée
Et j'sommes tréjous heûtheurs et dgais.
Èrfrain
Ha, ha, ha! - ma modgie d'cidre,
I' m'en faut un bouôn lèrmîn,
Ha, ha, ha! - ma modgie d'cidre,
Vite, acouothe un p'tit gouttîn!
Touos les jours j'sis dans les clios,
Jé souongne la tèrre et les bestchiaux,
À la maîntchi d'la matinnée
J'dêhale man cidre et ma beurrée.
Èrfrain,
Ha, ha, ha! - ma modgie d'cidre,
I' m'en faut un bouôn lèrmîn,
Ha, ha, ha! - ma modgie d'cidre,
Vite, acouothe un p'tit gouttîn!
Lé matîn d'vant qu' d'alleunmer l'feu,
J'vais faithe un tou dans man preinseu,
Jé prends man mogue, j'en bai eune lache
Pour mé raffraîchi bein la fache.
Èrfrain,
Ha, ha, ha! - ma modgie d'cidre,
I' m'en faut un bouôn lèrmîn,
Ha, ha, ha! - ma modgie d'cidre,
Vite, acouothe un p'tit gouttîn!
J'al tréjous pour mé rassasier .
Eune bollée d'soupe à man dînner,
Patates et lard, chu bouôn fricot,
Et du cidre à tare-larigot.
Èrfrain,
Ha, ha, ha! - ma modgie d'cidre,
I' m'en faut un bouôn lèrmîn,
Ha, ha, ha! - ma modgie d'cidre,
Vite, acouothe un p'tit gouttîn!
Man jour finni, j'aime à m'caûffer .
Auve ma bouonnefemme à côté d'mé;
Tandi qu'oulle ouvre et dèrne et coud,
J'lié ma gâzette et j'bai deux d'goûts
Èrfrain,
Ha, ha, ha! - ma modgie d'cidre,
I' m'en faut un bouôn lèrmîn,
Ha, ha, ha! - ma modgie d'cidre,
Vite, acouothe un p'tit gouttîn!
