Y'a un grand contraste entre les côtes dé Jèrri. La côte du Vouêt est bein sauvage auve des mielles et des louêmes d'l'Atlantique. Ch'est raide bouôn pouor la seurféthie.

J'avons des falaises au Nord, auve des p'tits hâvres et ports. L'Êst est pus à l'abri et est dominné par l'Vièr Châté. La Baie Rouoyale dé Grouville est bein sablionneuse mais l'sablion n'est pon aussi fîn coumme au Vouêt.

La mâjorité d'la populâtion d'meuthe par la côte du Sud, et y'a un tas d'maîsons, dé cauminnes et d'bâtisses - sustout entre la Ville et St. Aubîn.

La Ville est grande et affaithée mais y'a d'bieaux bâtisses là. La vraie bieauté d'Jèrri est à vaie à la campangne: les clios, les côtils, les c'mîns et les vallées.

La vaque dé Jèrri est bein fanmeuse pa'ce qu'ou nos donne du lait tch'est hardi riche. Les vaques sont couleu d'myi auve des bieaux ièrs.